ਨਵੀਆਂ ਸੜਕਾਂ ਬਣਾ ਕੇ ਪ੍ਰੀਮਿਕਸ ਪਾਉਣੀ ਭੁੱਲਿਆ ਪੰਜਾਬ ਮੰਡੀ ਬੋਰਡ

ਬਲਾਚੌਰ, 25 ਜੂਨ (ਜਤਿੰਦਰ ਪਾਲ ਸਿੰਘ ਕਲੇਰ ) ਮਜਾਰੀ ਖੇਤਰ ‘ਚ ਪਿਛਲੀ ਕਾਂਗਰਸ ਸਰਕਾਰ ਦੇ ਸਾਬਕਾ ਵਿਧਾਇਕ ਚੌ: ਦਰਸ਼ਨ ਲਾਲ ਮੰਗੂਪੁਰ ਦੇ ਯਤਨਾਂ ਸਦਕਾ ਪਿੰਡਾਂ ਦੇ ਲੋਕਾਂ ਨੂੰ ਵਧੀਆ ਸਹੂਲਤ ਦੇਣ ਲਈ ਕੁਝ ਨਵੀਆਂ ਸੜਕਾਂ ਜਿਨ੍ਹਾਂ ‘ਚ ਸਿੰਬਲ ਮਜਾਰਾ ਤੋਂ ਰੁੜਕੀ ਮੁਗਲਾਂ, ਚਣਕੋਈ ਤੋਂ ਚਣਕੋਆ ਤੇ ਰੱਕੜਾਂ ਢਾਹਾਂ ਤੋਂ ਪੀਰ ਬੇਰੀ ਸ਼ਾਹ ਤੱਕ ਬਣਵਾਈਆਂ ਗਈਆਂ ਸਨ | ਜਿਨ੍ਹਾਂ ਨੂੰ ਪੰਜਾਬ ਮੰਡੀ ਬੋਰਡ ਵਲੋਂ ਪੱਥਰ ਪਾ ਕੇ ਤਿਆਰ ਕਰਵਾ ਦਿੱਤਾ ਗਿਆ ਸੀ ਪਰ ਮੰਡੀ ਬੋਰਡ ਇਨ੍ਹਾਂ ਸੜਕਾਂ ‘ਤੇ ਲੁੱਕ ਮਿਕਸ ਬਜਰੀ ਪਾਉਣੀ ਭੁੱਲ ਗਿਆ | ਜਿਸ ਕਾਰਨ ਇਨ੍ਹਾਂ ਸੜਕਾਂ ਦਾ ਪੱਥਰ ਖਿਲਰਿਆ ਪਿਆ ਹੈ, ਜੋ ਆਣ ਜਾਣ ਵਾਲੇ ਰਾਹਗੀਰਾਂ ਲਈ ਮੁਸੀਬਤ ਬਣ ਰਿਹਾ ਹੈ | ਹੁਣ ਅੱਗੋਂ ਬਰਸਾਤ ਦਾ ਮੌਸਮ ਸ਼ੁਰੂ ਹੋਣ ਵਾਲਾ ਹੈ | ਜੇਕਰ ਇਨ੍ਹਾਂ ਸੜਕਾਂ ‘ਤੇ ਪ੍ਰੀਮਿਕਸ ਨਾ ਪਾਈ ਗਈ ਤਾਂ ਬਰਸਾਤਾਂ ਦੇ ਪਾਣੀਆਂ ਨਾਲ ਸਾਰਾ ਪੱਥਰ ਹੜ੍ਹਨ ਦਾ ਖ਼ਤਰਾ ਬਣ ਜਾਵੇਗਾ | ਇਨ੍ਹਾਂ ਪਿੰਡਾਂ ਦੀਆਂ ਪੰਚਾਇਤਾਂ ਨੇ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਇਨ੍ਹਾਂ ਸੜਕਾਂ ‘ਤੇ ਮੀਂਹ ਸ਼ੁਰੂ ਹੋਣ ਤੋਂ ਪਹਿਲਾਂ ਪ੍ਰੀਮਿਕਸ ਪਾਈ ਜਾਵੇ ਤੇ ਲੋਕਾਂ ਨੂੰ ਬਣਦੀ ਸਹੂਲਤ ਦਿੱਤੀ ਜਾਵੇ |