ਚੋਰਾਂ ਨੇ ਬਣਾਇਆ ਮੋਬਾਇਲ ਫੋਨਾਂ ਦੀ ਦੁਕਾਨ ਨੂੰ ਨਿਸ਼ਾਨਾ, ਲੱਖਾਂ ਦਾ ਸਾਮਾਨ ਚੋਰੀ  

ਬਲਾਚੌਰ / ਕਾਠਗਡ਼੍ਹ, 22 ਜੂਨ (ਜਤਿੰਦਰ ਪਾਲ ਸਿੰਘ ਕਲੇਰ) : ਬੀਤੀ ਰਾਤ ਕਾਠਗਡ਼੍ਹ ਮੋਡ਼ ‘ਤੇ ਸਥਿਤ ਇਕ ਮੋਬਾਇਲ ਫੋਨਾਂ ਦੀ ਦੁਕਾਨ ਨੂੰ ਚੋਰਾਂ ਵਲੋਂ ਨਿਸ਼ਾਨਾ ਬਣਾਉਂਦੇ ਹੋਏ ਲੱਖਾਂ ਰੁਪਏ ਦੇ ਸਾਮਾਨ ‘ਤੇ ਹੱਥ ਸਾਫ ਕੀਤੇ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਕਾਠਗਡ਼੍ਹ ਮੋਡ਼ ‘ਤੇ ਸਥਿਤ ਚੀਮਾ ਟੈਲੀਕੌਮ ਦੁਕਾਨ ਦੇ ਮਾਲਕ ਗੁਰਵਿੰਦਰ ਸਿੰਘ ਚੀਮਾ ਨੇ ਚੋਰੀ ਦੀ ਵਾਰਦਾਤ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਉਹ ਰੋਜ਼ ਵਾਂਗ  ਬੀਤੀ ਸ਼ਾਮ ਨੂੰ ਦੁਕਾਨ ਬੰਦ ਕਰਕੇ ਚਲਾ ਗਿਆ ਲੇਕਿਨ ਸਵੇਰੇ ਪੰਜ ਵਜੇ ਦੇ ਕਰੀਬ ਉਸ ਨੂੰ ਕਾਠਗਡ਼੍ਹ ਜਿਮ ਲਈ ਜਾਂਦੇ ਉਸ ਦੇ ਦੋਸਤਾਂ ਨੇ ਫੋਨ ਕਰਕੇ ਦੱਸਿਆ ਕਿ ਤੁਹਾਡੀ ਦੁਕਾਨ ਦਾ ਸ਼ਟਰ ਚੁੱਕਿਆ ਹੋਇਆ ਹੈ ਜਿਸ ਤੋਂ ਬਾਅਦ ਉਹ ਤੁਰੰਤ ਦੁਕਾਨ ਤੇ ਪਹੁੰਚ ਗਿਆ  ਅਤੇ ਦੇਖਿਆ ਕਿ ਦੁਕਾਨ ਦਾ ਸ਼ਟਰ ਵਿੰਗਾ ਕਰਕੇ ਕਿਸੇ ਚੀਜ਼ ਨਾਲ ਉੱਪਰ ਨੂੰ ਖਿੱਚਿਆ ਹੋਇਆ ਸੀ । ਸ਼ਟਰ ਦੀ ਹਾਲਤ ਦੇਖ ਕੇ ਉਸ ਨੂੰ ਚੋਰੀ ਹੋਣ ਦਾ ਸ਼ੱਕ ਹੋਇਆ ਤੇ ਉਸ ਨੇ ਤੁਰੰਤ ਥਾਣਾ ਕਾਠਗੜ੍ਹ ਦੀ ਪੁਲਸ ਨੂੰ ਫੋਨ ਕਰਕੇ ਦੱਸਿਆ । ਕੁਝ ਹੀ ਦੇਰ ਵਿਚ ਥਾਣਾ ਕਾਠਗਡ਼੍ਹ ਤੋਂ ਪੁਲੀਸ ਮੁਲਾਜ਼ਮ ਮੌਕੇ ਤੇ ਪਹੁੰਚ ਗਏ ਤੇ ਉਨ੍ਹਾਂ ਛਾਣਬੀਣ ਸ਼ੁਰੂ ਕਰ ਦਿੱਤੀ । ਦੁਕਾਨ ਮਾਲਕ ਚੀਮਾ ਨੇ ਦੱਸਿਆ ਕਿ ਉਸਦੀ ਦੁਕਾਨ ਚੋਂ ਮਹਿੰਗੇ ਅਤੇ ਸਸਤੇ ਮੋਬਾਇਲਾਂ ਤੋਂ ਇਲਾਵਾ ਮੁਰੰਮਤ ਲਈ ਆਏ ਮੋਬਾਈਲ, ਮੋਬਾਇਲਾਂ ਦੀ ਅਸੈਸਰੀ ਅਤੇ ਗੱਲੇ ਵਿੱਚ ਪਏ ਪੈਸੇ ਵੀ ਲੈ ਗਏ ਲੱਖਾਂ ਰੁਪਏ ਦਾ ਸਾਮਾਨ  ਚੋਰਾਂ ਦੁਆਰਾ ਚੋਰੀ ਕੀਤਾ ਜਾ ਚੁੱਕਿਆ ਹੈ । ਉਸ ਨੇ ਦੱਸਿਆ ਕਿ ਚੋਰੀ ਦੀ ਇਸ ਘਟਨਾ ਨਾਲ ਉਸ ਦਾ ਕਾਫੀ ਨੁਕਸਾਨ ਹੋਇਆ ਹੈ ਜਿਸ ਦੀ ਭਰਪਾਈ ਕਰਨੀ ਉਸ ਲਈ ਬਹੁਤ ਕਠਿਨ ਹੈ । ਚੋਰੀ ਦੀ ਇਸ ਵਾਰਦਾਤ ਨੂੰ ਲੈ ਕੇ ਦੂਜੇ ਦੁਕਾਨ ਦਾਰ ਵੀ ਕਾਫ਼ੀ ਚਿੰਤਤ ਹਨ।