*ਥਾਣਾ ਮੇਹਟੀਆਣਾ ਦੀ ਪੁਲਸ ਫਿਰ ਤੋਂ ਵਿਵਾਦਾਂ ਦੇ ਘੇਰੇ ਚ* 

*ਥਾਣੇਦਾਰ ਸੁਖਵਿੰਦਰ ਸਿੰਘ ਤੇ ਲੱਗੇ ਔਰਤਾਂ ਨਾਲ ਬਦਸਲੂਕੀ ਕਰਨ ਦੇ ਗੰਭੀਰ ਦੋਸ਼*

ਹੁਸ਼ਿਆਰਪੁਰ, 22 ਮਾਰਚ (ਤਰਸੇਮ ਦੀਵਾਨਾ) : ਥਾਣਾ ਮੇਹਟੀਆਣਾ ਦੀ ਪੁਲਸ ਅਕਸਰ ਹੀ ਵਿਵਾਦਾਂ ਦੇ ਘੇਰੇ ਚ ਘਿਰੀ ਰਹਿੰਦੀ ਹੈ। ਹੁਣ ਫਿਰ ਥਾਣੇਦਾਰ ਸੁਖਵਿੰਦਰ ਸਿੰਘ ਨੇ ਪਿੰਡ ਮਾਨਾਂ ਦੀਆਂ ਔਰਤਾਂ ਨਾਲ ਖਾਕੀ ਵਰਦੀ ਦੀ ਧੌਂਸ ਦਿਖਾਉਂਦਿਆ ਬਦਸਲੂਕੀ ਕਰਕੇ ਪੁਲਸ ਪ੍ਰਸ਼ਾਸਨ ਦਾ ਅਕਸ ਖ਼ਰਾਬ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਜਾਣਕਾਰੀ ਮੁਤਾਬਿਕ ਦੱਸ ਦਈਏ ਕਿ ਥਾਣਾ ਮੇਹਟੀਆਣਾ ਅਧੀਨ ਪੈਂਦੇ ਪਿੰਡ ਮਾਨਾਂ ਦੀ ਰਹਿਣ ਵਾਲੀ ਰਿਟਾਇਰਡ ਡੀ.ਐੱਸ.ਪੀ.ਪੰਜਾਬ ਪੁਲੀਸ ਦੀ ਵਿਧਵਾ ਪਤਨੀ ਬਚਨ ਕੌਰ ਨੇ ਏ.ਐੱਸ.ਆਈ.ਸੁਖਵਿੰਦਰ ਸਿੰਘ ਤੇ ਔਰਤਾਂ ਨਾਲ ਬਦਸਲੂਕੀ ਕਰਨ ਦੇ ਗੰਭੀਰ ਦੋਸ਼ ਲਗਾਏ ਹਨ। ਜਾਣਕਾਰੀ ਦਿੰਦਿਆਂ ਬਚਨ ਕੌਰ ਨੇ ਦੱਸਿਆ ਕਿ ਮੇਹਟੀਆਣਾ ਪੁਲੀਸ ਵੱਲੋਂ ਉਸ ਦੇ ਦੋ ਪੁੱਤਰਾਂ ਖ਼ਿਲਾਫ਼ ਵਿਰੋਧੀ ਧਿਰ ਨਾਲ ਮਿਲੀਭੁਗਤ ਕਰਕੇ ਝੂਠੇ ਤੱਤਾਂ ਦੇ ਆਧਾਰ ਤੇ ਝੂਠਾ ਕੇਸ ਥੋਪਿਆ ਗਿਆ ਹੈ। ਜਿਸ ਦੀ ਤਫਤੀਸ਼ ਮਾਣਯੋਗ ਡੀ.ਐੱਸ.ਪੀ.ਦਿਹਾਤੀ ਪਾਸ ਚੱਲ ਰਹੀ ਹੈ। ਇਸ ਦੇ ਬਾਵਜੂਦ 19 ਮਾਰਚ ਨੂੰ ਏ.ਐੱਸ.ਆਈ. ਸੁਖਵਿੰਦਰ ਸਿੰਘ ਸਮੇਤ ਹੋਰ ਪੁਲਸ ਪਾਰਟੀ ਸ਼ਿਕਾਇਤਕਰਤਾ ਦੇ ਘਰ ਅੰਦਰ ਬਿਨਾਂ ਗ੍ਰਿਫਤਾਰੀ ਵਾਰੰਟ ਤੋਂ ਜ਼ਬਰਦਸਤੀ ਦਾਖਲ ਹੋ ਕੇ ਘਰ ਦੀ ਫਰੋਲਾ ਫਰਾਲੀ ਕੀਤੀ ਗਈ। ਇੱਥੇ ਹੀ ਬੱਸ ਨਹੀਂ ਬਚਨ ਕੌਰ ਨੇ ਦੱਸਿਆ ਕਿ ਥਾਣੇਦਾਰ ਸੁਖਵਿੰਦਰ ਸਿੰਘ ਵੱਲੋਂ ਘਰ ਵਿੱਚ ਹਾਜ਼ਰ ਉਨ੍ਹਾਂ ਨੂੰਹ ਸੱਸ ਨਾਲ ਗਾਲੀ ਗਲੋਚ ਕਰਦਿਆਂ ਉਸ ਦੇ ਪੁੱਤਰਾਂ ਖ਼ਿਲਾਫ਼ ਨਸ਼ੇ ਦਾ ਇੱਕ ਹੋਰ ਝੂਠਾ ਕੇਸ ਦਰਜ ਕਰਨ ਦੀਆਂ ਧਮਕੀਆਂ ਵੀ ਦਿੱਤੀਆਂ ਗਈਆਂ। ਪੀਡ਼ਤ ਔਰਤ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ 12 ਮਾਰਚ ਨੂੰ ਲੜਾਈ ਝਗੜੇ ਦੀ ਸ਼ਿਕਾਇਤ ਤੇ ਉਸ ਦੇ ਪਰਿਵਾਰ ਨੂੰ ਥਾਣੇ ਬੁਲਾ ਕੇ ਉਕਤ ਥਾਣੇਦਾਰ ਵੱਲੋਂ ਉਸ ਦੇ ਪੁੱਤਰਾਂ ਨਾਲ ਗਾਲੀ ਗਲੋਚ ਕੀਤਾ ਗਿਆ। ਅਤੇ ਔਰਤਾਂ ਨੂੰ ਭੱਦੀ ਸ਼ਬਦਾਵਲੀ ਬੋਲੀ ਗਈ। ਉਕਤ ਪੀਡ਼ਤ ਔਰਤ ਨੇ ਡਾਇਰੈਕਟਰ ਆਫ ਬਿਊਰੋ ਇਨਵੈਸਟੀਗੇਸ਼ਨ ਚੰਡੀਗਡ਼੍ਹ ਨੂੰ ਇੱਕ ਲਿਖਤੀ ਸ਼ਿਕਾਇਤ ਜਾਰੀ ਕਰਦਿਆਂ ਉਕਤ ਪੁਲਸ ਮੁਲਾਜ਼ਮ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ।
ਪੱਖ : ਜਦੋਂ ਏਐਸਆਈ ਸੁਖਵਿੰਦਰ ਸਿੰਘ ਦਾ ਪੱਖ ਜਾਨਣ ਲਈ ਉਨ੍ਹਾਂ ਦੇ ਨਾਲ ਫੋਨ ਤੇ ਰਾਬਤਾ ਕਾਇਮ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ ਮੈਂ ਪਿੰਡ ਮਾਨਾ ਵਿੱਚ ਗਿਆ ਜ਼ਰੂਰ ਸੀ ਪਰ ਮੈਂ ਇਕੱਲਾ ਨਹੀਂ ਸੀ ਮੇਰੇ ਨਾਲ  ਥਾਣਾ ਮੇਹਟੀਆਣਾ ਦੇ ਐਸਐਚਓ ਨਾਲ ਕੀ ਰੇਡ ਕਰਨ ਗਏ ਸੀ ਪ੍ਰੰਤੂ ਮੈਂ ਕਿਸੇ ਨਾਲ ਕੋਈ ਵੀ ਬਦਸਲੂਕੀ ਨਹੀਂ ਕੀਤੀ  ।
ਫੋਟੋ ਮੁਨੀਰ