ਗੜ੍ਹਦੀਵਾਲਾ 16 ਜਨਵਰੀ (ਚੌਧਰੀ) : ਚਾਈਨਾ ਡੋਰ ਦੀ ਵਿਕਰੀ ਦਾ ਧੰਦਾ ਗੜ੍ਹਦੀਵਾਲਾ ਵਿੱਚ ਬੇਖੌਫ ਚਲ ਰਿਹਾ ਹੈ।ਜਿਲਾ ਡਿਪਟੀ ਕਮਿਸ਼ਨਰ ਹੁਸ਼ਿਆਰਪੁਰ ਅਪਨੀਤ ਰਿਆਤ ਵਲੋਂ ਚਾਇਨਾ ਡੋਰ ਤੇ ਪਾਬੰਦੀ ਸਬੰਧੀ ਜਾਰੀ ਹੁਕਮਾਂ ਦੀਆਂ ਦੁਕਾਨਦਾਰਾਂ ਵਲੋਂ ਸ਼ਰੇਆਮ ਧੱਜੀਆਂ ਉਡਾਈਆਂ ਜਾ ਰਹੀਆਂ ਹਨ ਅਤੇ ਚਾਈਨਾ ਡੋਰ ਪੁਲਿਸ ਪ੍ਰਸ਼ਾਸਨ ਦੀ ਨੱਕ ਹੇਠ ਧੜੱਲੇ ਨਾਲ ਵੇਚੀਆਂ ਜਾ ਰਹੀ ਹੈ। ਇਸ ਖ਼ੂਨੀ ਚਾਈਨਾ ਡੋਰ ਨੇ ਅੱਜ ਇੱਕ  ਗੋਪਾਲ ਸ਼ਰਮਾ ਵਾਸੀ ਮੁਣਕਾਂ ਨਾਮਕ ਵਿਅਕਤੀ ਨੂੰ ਗੰਭੀਰ ਰੂਪ ਵਿਚ ਜਖਮੀ ਕਰ ਦਿੱਤਾ। ਗੋਪਾਲ ਨੇ ਦੱਸਿਆ ਕਿ ਜਦੋਂ ਮਸਤੀਵਾਲ ਰਸਤੇ ਹੋਕੇ ਪੰਡੋਰੀ ਅਟਵਾਲ ਆਪਣੀ ਭੂਆ ਦੇ ਘਰ ਜਾ ਰਿਹਾ ਸੀ ਤਾਂ ਚਾਇਨਾ ਡੋਰ ਨਾਲ ਬੁਰੀ ਤਰਾਂ ਜਖਮੀ ਹੋ ਗਿਆ। ਗੋਪਾਲ ਦੇ ਨੱਕ, ਗੱਲ, ਅਤੇ ਇਕ ਹੱਥ ਦੀ ਚੀਚੀ ਉਂਗਲੀ ਹੱਡੀ ਤੱਕ ਕੱਟੀ ਗਈ। ਜਿਸ ਨੂੰ ਪਿੰਡ ਵਾਸੀਆਂ ਦੀ ਮਦਦ ਨਾਲ ਗੜ੍ਹਦੀਵਾਲਾ ਦੇ ਇੱਕ ਨਿੱਜੀ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ, ਜਿੱਥੇ ਉਸ ਦੇ ਹੱਥ ਤੇ 6 ਟਾਂਕੇ ਲੱਗੇ ਹਨ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਕੁਝ ਦਿਨ ਬਾਅਦ ਐਕਸਰੇ ਕਰਕੇ ਪਤਾ ਲੱਗੇਗਾ ਕਿ ਉਂਗਲੀ ਪੂਰੀ ਤਰ੍ਹਾਂ ਕੰਮ ਕਰਨ ਦੇ ਯੋਗ ਹੈ ਜਾਂ ਨਹੀਂ।