ਟਾਂਡਾ / ਦਸੂਹਾ (ਚੌਧਰੀ) 

5 ਨਕਾਬਪੋਸ਼ਾਂ ਨੇ ਇੱਕ ਘਰ ਚ ਦਾਖਲ ਹੋਕੇ ਪਤੀ-ਪਤਨੀ ਨੂੰ ਤੇਜ ਹਥਿਆਰਾਂ ਨਾਲ ਕੀਤਾ ਜਖਮੀ, ਲੱਖਾਂ ਦੀ ਨਕਦੀ, ਡਾਲਰ, ਯੂਰੋ ਤੇ ਗਹਿਣੇ ਲੁੱਟ ਕੇ ਹੋਏ ਫਰਾਰ 

2 ਅਕਤੂਬਰ : ਬੀਤੀ ਸ਼ਨੀਵਾਰ ਰਾਤ ਪਿੰਡ ਗਿਲਜੀਆਂ ਵਿਖੇ 5 ਅਣਪਛਾਤੇ ਲੁਟੇਰਿਆਂ ਇੱਕ ਘਰ ਅੰਦਰ ਦਾਖਲ ਹੋ ਕੇ ਤੇ ਤੇਜ ਹਥਿਆਰ ਨਾਲ ਪਤੀ-ਪਤਨੀ ਨੂੰ ਜਖਮੀ ਕਰਕੇ ਲੱਖਾਂ ਰੁਪਏ ਦੀ ਨਕਦੀ,ਡਾਲਰ, ਯੂਰੋ ਤੇ ਗਹਿਣੇ ਲੁੱਟ ਕੇ ਫਰਾਰ ਹੋ ਗਏ ਹੋ ਦਾ ਸਮਾਚਾਰ ਮਿਲਿਆ ਹੈ। ਜਖਮੀਆਂ ਨੂੰ ਜਲੰਧਰ ਦੇ ਇੱਕ ਨਿੱਜੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਹੈ। ਜਖਮੀਆਂ ਦੀ ਪਛਾਣ ਪਤੀ ਪਤਨੀ ਬਲਵਿੰਦਰ ਸਿੰਘ ਪੁੱਤਰ ਭੁੱਲਾ ਸਿੰਘ ਅਤੇ ਰਾਜ ਕੌਰ ਵਜੋਂ ਹੋਈ ਹੈ|ਨਕਾਬਪੋਸ਼ ਲੁਟੇਰਿਆਂ ਨੇ ਅੱਧੀ ਰਾਤ 1.30 ਵਜੇ ਦੇ ਕਰੀਬ ਵਾਰਦਾਤ ਨੂੰ ਅੰਜਾਮ ਦਿੱਤਾ ਅਤੇ ਲੁਟੇਰੇ ਲਗਭਗ ਡੇਢ ਘੰਟਾ ਘਰ ਦੇ ਅੰਦਰ ਰਹੇ। ਲੁਟੇਰਿਆਂ ਤੇਜ਼ਧਾਰ ਹਥਿਆਰਾ ਅਤੇ ਲੋਹੇ ਦੀ ਰਾਡ ਨਾਲ ਦਰਵਾਜੇ ਤੋੜੇ ਅਤੇ ਅੰਦਰ ਮੌਜੂਦ ਬਲਵਿੰਦਰ ਸਿੰਘ ਅਤੇ ਉਸਦੀ ਪਤਨੀ ਨੂੰ ਤੇਜ਼ਧਾਰ ਹਥਿਆਰਾਂ ਨਾਲ  ਜਖਮੀ ਕਰ ਦਿੱਤਾ ਅਤੇ ਉਨ੍ਹਾਂ ਦੀ ਨੂੰਹ ਦਵਿੰਦਰ ਕੌਰ ਨਾਲ ਮਾਰਕੁਟਾਈ ਕੀਤੀ ਜਦਕਿ ਬਲਵਿੰਦਰ ਸਿੰਘ ਦੇ ਭਰਾ ਸਤਪਾਲ ਸਿੰਘ ਨੂੰ ਇਕ ਕਮਰੇ ਵਿਚ ਬੰਦ ਕਰ ਦਿੱਤਾ । ਨੂੰਹ ਦਵਿੰਦਰ ਕੌਰ ਨੇ ਦੱਸਿਆ ਕਿ ਲੁਟੇਰੇ ਘਰ ਵਿੱਚੋ ਲਗਭਗ 7 ਲੱਖ 50 ਰੁਪਏ ਦੀ ਨਕਦੀ,55 ਸੌ ਅਮਰੀਕੀ ਡਾਲਰ ,800 ਯੂਰੋ ਕਰੰਸੀ ਅਤੇ ਸੋਨੇ ਦੇ ਗਹਿਣੇ ਲੁੱਟ ਕੇ ਲੈ ਗਏ। ਵਾਰਦਾਤ ਦੀ ਸੂਚਨਾ ਮਿਲਣ ਤੇ ਡੀਐੱਸਪੀ.ਟਾਂਡਾ ਕੁਲਵੰਤ ਸਿੰਘ ਅਤੇ ਐਡੀਸ਼ਨਲ ਐੱਸਐੱਚਓ.ਪਰਵਿੰਦਰ ਸਿੰਘ ਪੁਲਿਸ ਟੀਮ ਨਾਲ ਮੌਕੇ ਤੇ ਪਹੁੰਚ ਕੇ ਪਰਿਵਾਰਕ ਮੈਬਰਾਂ ਦੇ ਬਿਆਨ ਕਲਮਬੰਦ ਕੀਤੇ ਤੇ ਲੁਟੇਰਿਆਂ ਦੀ ਭਾਲ ਸ਼ੂਰੂ ਕਰ ਦਿੱਤੀ ਹੈ।