ਹੁਸ਼ਿਆਰਪੁਰ (ਬਿਊਰੋ) 

–ਬਾਬਾ ਸ਼ਾਂਤੀ ਗਿਰੀ ਹਾਲ ਦਸੂਹਾ ’ਚ ਅਲਿਮਕੋ ਕੰਪਨੀ ਦੇ ਸਹਿਯੋਗ ਨਾਲ ਲਗਾਇਆ ਗਿਆ ਕੈਂਪ

5 ਫਰਵਰੀ : ਸਮਾਜਿਕ ਸੁਰੱਖਿਆ ਤੇ ਬਾਲ ਵਿਕਾਸ ਵਿਭਾਗ ਵਲੋਂ ਭਾਰਤ ਸਰਕਾਰ ਵਲੋਂ ਚਲਾਈ ਜਾ ਰਹੀ ਐਡਿਪ ਸਕੀਮ ਤਹਿਤ ਦਿਵਿਆਂਗ ਵਿਅਕਤੀਆਂ ਨੂੰ ਮੁਫ਼ਤ ਉਪਕਰਨ ਵੰਡਣ ਲਈ ਅਲਿਮਕੋ ਕੰਪਨੀ ਦੇ ਸਹਿਯੋਗ ਨਾਲ ਬਾਬਾ ਸ਼ਾਂਤੀ ਗਿਰੀ ਹਾਲ ਦਸੂਹਾ ਵਿਚ ਕੈਂਪ ਲਗਾਇਆ ਗਿਆ। ਕੈਂਪ ਦਾ ਉਦਘਾਟਨ ਰਿਅਲ ਵੈਲਫੇਅਰ ਸੋਸਾਇਟੀ ਦੇ ਪ੍ਰਧਾਨ ਪਵਨ ਪਲਟਾ ਵਲੋਂ ਕੀਤਾ ਗਿਆ। ਜਾਣਕਾਰੀ ਦਿੰਦੇ ਹੋਏ ਬਾਲ ਵਿਕਾਸ ਪ੍ਰੋਜੈਕਟ ਅਫ਼ਸਰ ਦਸੂਹਾ ਮੰਜੂ ਬਾਲਾ ਨੇ ਦੱਸਿਆ ਕਿ ਵਿਭਾਗ ਦੇ ਸਮੂਹ ਸਟਾਫ਼ ਵਲੋਂ ਇਸ ਕੈਂਪ ਦੇ ਪ੍ਰਬੰਧ ਮੁਕੰਮਲ ਕੀਤੇ ਗਏ। ਉਨ੍ਹਾਂ ਦੱਸਿਆ ਕਿ ਅਲਿਮਕੋ ਕੰਪਨੀ ਵਲੋਂ ਪਹਿਲਾਂ ਤੋਂ ਹੀ ਸ਼ਨਾਖਤ ਦਿਵਿਆਂਗਜਨ ਨੂੰ 5 ਇਲੈਕਟ੍ਰੋਨਿਕ ਟਰਾਈ ਸਾਈਕਲ, 2 ਸਧਾਰਨ ਟਰਾਈ ਸਾਈਕਲ, 6 ਵੀਲ੍ਹ ਚੇਅਰ, 6 ਐਮ.ਆਰ. ਕਿੱਟ, ਚਾਰ ਕੰਨਾਂ ਦੀਆਂ ਮਸ਼ੀਨਾਂ, ਬੈਸਾਖੀਆਂ, ਰੋਲੇਟਰ, 3 ਸੀ.ਪੀ. ਚੇਅਰ, 3 ਬਨਾਵਟੀ ਅੰਗ ਅਤੇ 5 ਕੈਲੀਪਰ ਵੰਡੇ ਗਏ। ਮੰਜੂ ਬਾਲਾ ਨੇ ਦੱਸਿਆ ਕਿ ਕੁੱਲ 27 ਵਿਦਿਆਂਗਜਨ ਨੂੰ 50 ਉਪਕਰਨ ਵੰਡੇ ਗਏ। ਇਸ ਕੈਂਪ ਦੇ ਸਫ਼ਲ ਆਯੋਜਨ ਲਈ ਬਾਬਾ ਸ਼ਾਂਤੀ ਗਿਰੀ ਹਾਲ ਦਸੂਹਾ ਦੇ ਪੂਰੇ ਸਟਾਫ਼ ਵਲੋਂ ਸਹਿਯੋਗ ਦਿੱਤਾ ਗਿਆ।