ਹੁਸ਼ਿਆਰਪੁਰ(ਚੌਧਰੀ) 

8 ਜਨਵਰੀ : ਨਿਰੰਕਾਰੀ ਸਤਿਗੁਰੂ ਮਾਤਾ ਸੁਦੀਕਸ਼ਾ ਜੀ ਮਹਾਰਾਜ ਨੇ ਅੱਜ ਜੰਮੂ ਕਸ਼ਮੀਰ ਦੇ ਊਧਮਪੁਰ ਸ਼ਹਿਰ ਵਿਖੇ ਹੋਏ ਵਿਸ਼ਾਲ ਨਿਰੰਕਾਰੀ ਸੰਤ ਸਮਾਗਮ ਮੌਕੇ ਹਜ਼ਾਰਾਂ ਦੀ ਗਿਣਤੀ ਵਿੱਚ ਪਹੁੰਚੀਆਂ ਸੰਗਤਾਂ ਨੂੰ ਅਸ਼ੀਰਵਾਦ ਦਿੰਦਿਆਂ ਫਰਮਾਇਆ ਕਿ ਪ੍ਰਮਾਤਮਾ ਨਾਲ ਜੁੜਕੇ ਜਿਉਂਦੇ ਜੀ ਮੁਕਤੀ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਸੰਤ ਭਗਤ ਆਪਣੇ ਗ੍ਰਹਿਸਥੀ ਜੀਵਨ ਬਤੀਤ ਕਰਨ ਦੇ ਨਾਲ ਨਾਲ ਪੂਰੇ ਸੰਸਾਰ ਦਾ ਭਲਾ ਕਰਦੇ ਹਨ।ਜੇਕਰ ਤਪਦੀ ਗਰਮੀ ਹੋਵੇ ਤਾਂ ਸੰਤ ਭਗਤ ਠੰਡ ਬਰਸਾਉਂਦੇ ਹਨ ਤੇ ਪੂਰੀ ਠੰਡ ਵਿੱਚ ਸਭ ਨੂੰ ਨਿੱਘ ਬਖਸ਼ਦੇ ਹਨ ਪਰ ਦੂਜੇ ਪਾਸੇ ਬਾਕੀ ਦੁਨੀਆਂ ਸੰਸਾਰ ਨੂੰ ਮਾਇਆ ਰੂਪ ਵਿੱਚ ਦੇਖ ਕੇ ਇਸ ਵਿੱਚ ਹੀ ਉਲਝੀ ਰਹਿੰਦੀ ਹੈ ਤੇ ਹੰਕਾਰ ਨੂੰ ਪ੍ਰਬਲ ਕਰਕੇ ਆਪਣੇ ਕੰਮ ਕਰਦੀ ਹੈ। ਸੰਤ ਭਗਤ ਜਿੰਨ੍ਹੇ ਮਰਜੀ ਉੱਚੇ ਹੋ ਜਾਣ ਪਰ ਸਭ ਪ੍ਰਮਾਤਮਾ ਦੀ ਦੇਣ ਸਮਝਦੇ ਹਨ, ਸਭ ਦਾ ਭਲਾ ਕਰਦੇ ਹਨ, ਹਰ ਕਿਸੇ ਨੂੰ ਖੁਸ਼ੀ ਦੇਣ ਦੀ ਕੋਸ਼ਿਸ਼ ਕਰਦੇ ਹਨ। ਇੱਧਰ ਉਧਰ ਦੀਆਂ ਗੱਲਾਂ ਸੁਣਾ ਕੇ ਟਾਈਮ ਪਾਸ ਨਹੀਂ ਕਰਦੇ ਸਗੋੋਂ ਸਮਝਾਉਂਦੇ ਹਨ ਕਿ ਦੁੱਖ ਤੇ ਸੁੱਖ ਤਾਂ ਜਿੰਦਗੀ ਵਿੱਚ ਆਉਂਦੇ ਜਾਂਦੇ ਰਹਿੰਦੇ ਹਨ ਤੇ ਇਹ ਬ੍ਰਹਮਗਿਆਨ ਦੀ ਸਮਝ ਸਾਡੀ ਆਤਮਾ ਨੂੰ ਸਦਾ ਲਈ ਪ੍ਰਮਾਤਮਾ ਦੀ ਪਹਿਚਾਣ ਕਰਵਾ ਕੇ ਸਮਦਿ੍ਰਸ਼ਟੀ ਵਾਲਾ ਨਜ਼ਰੀਆ ਪ੍ਰਦਾਨ ਕਰਦੀ ਹੈ।

ਬੇਸ਼ੱਕ ਕੋਈ ਵਿਦਿਆਰਥੀ ਹੋਵੇ, ਨੌਕਰੀਪੇਸ਼ਾ ਜਾਂ ਵਪਾਰੀ ਹੋਵੇ ਭਗਤ ਹਮੇਸ਼ਾ ਗ੍ਰਹਿਸਥੀ ਜੀਵਨ ਦੀਆਂ ਜਿੰਮੇਵਾਰੀਆਂ ਨਿਭਾਉਂਦੇ ਹੋਏ ਨਾਲ ਨਾਲ ਭਗਤੀ ਵੀ ਕਰਦੇ ਹਨ। ਇਸ ਭਗਤੀ ਦਾ ਪੱਕਾ ਰੰਗ ਜਿਸਤੇ ਚੜ੍ਹ ਜਾਂਦਾ ਹੈ ਉਹ ਇਨਸਾਨ ਹਮੇਸ਼ਾ, ਹਰ ਸਮੇਂ, ਹਰ ਜਗ੍ਹਾ ਪੂਰਨ ਰਹਿੰਦਾ ਹੈ ਤੇ ਸਥਿਰ ਨਾਲ ਜੁੜਿਆ ਰਹਿੰਦਾ ਹੈ। ਆਤਮਾ ਦੀ ਤੜਫ਼ ਜੋ ਹੈ ਉਹ ਪੂਰੇ ਸੰਸਾਰ ਲਈ ਆਪਣਾ ਯੋਗਦਾਨ ਦਿੰਦੀ ਹੈ। ਸਰੀਰ ਤਾਂ ਕਿਸੇ ਵੀ ਸਮੇਂ ਖਤਮ ਹੋ ਸਕਦਾ ਹੈ ਬਚਪਨ, ਜਵਾਨੀ ਜਾਂ ਬੁਢਾਪਾ। ਇਸ ਲਈ ਅਸੀਂ ਪ੍ਰਮਾਤਮਾ ਦੀ ਪਹਿਚਾਣ ਕਰਨ ਲਈ ਸਮੇਂ ਦਾ ਇੰਤਜਾਰ ਨਹੀਂ ਕਰਨਾ ਸਗੋਂ ਸ਼ੁਰੂ ਤੋਂ ਹੀ ਇਸ ਪ੍ਰਮਾਤਮਾ ਦੀ ਪਹਿਚਾਣ ਕਰਕੇ ਜੀਵਨ ਬਤੀਤ ਕਰਨਾ ਹੈ। ਪੂਰਨ ਪ੍ਰਮਾਤਮਾ ਨਾਲ ਜੁੜਕੇ ਜਿਉਂਦੇ ਜੀ ਮੁਕਤੀ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਉਹਨਾਂ ਅੱਗੇ ਫਰਮਾਇਆ ਕਿ ਜਿਸ ਤਰ੍ਹਾਂ ਪਾਣੀ ਨੂੰ ਆਪਣੀ ਅਸਲੀ ਪਹਿਚਾਣ ਗਲਾਸ ਜਾਂ ਪਾਣੀ ਦੀ ਬੋਤਲ ਦੇ ਅਕਾਰ ਤੋਂ ਨਹੀਂ ਸਗੋਂ ਪਿਆਸ ਬੁਝਾਉਣ ਵਾਲੇ ਪਾਣੀ ਤੇ ਵਿਸ਼ਾਲ ਸਾਗਰ ਤੋਂ ਹੁੰਦੀ ਹੈ ਉਸੇ ਤਰ੍ਹਾਂ ਆਤਮਾ ਸਰੀਰ ਰੂਪੀ ਛੋਟੇ ਦਾਇਰੇ ਵਿੱਚ ਰਹਿੰਦੀ ਹੋਈ ਤਾਂ ਤੜਪਦੀ ਹੈ, ਸੀਮਤ ਰਹਿੰਦੀ ਹੈ ਪਰ ਜਦੋਂ ਇਸ ਆਤਮਾ ਨੂੰ ਬ੍ਰਹਮਗਿਆਨ ਹੋ ਜਾਂਦਾ ਹੈ ਤਾਂ ਇਹ ਨਿਰੰਕਾਰ ਨੂੰ ਜੁੜ ਕੇ ਵਿਸ਼ਾਲ ਬਣ ਜਾਂਦੀ ਹੈ, ਮੁਕਤ ਹੋ ਜਾਂਦੀ ਹੈ। ਉਹਨਾਂ ਸਭ ਨੂੰ ਬ੍ਰਹਮਗਿਆਨ ਨਾਲ ਜੁੜ ਕੇ ਸੇਵਾ, ਸਿਮਰਨ, ਸਤਿਸੰਗ ਕਰਦੇ ਹੋਏ ਗੁਰੂਆਂ ਦੀਆਂ ਸਿੱਖਿਆਵਾਂ ਨੂੰ ਅਮਲੀ ਰੂਪ ਵਿੱਚ ਮੰਨਕੇ, ਪੂਰੇ ਸੰਸਾਰ ਨੂੰ ਆਪਣਾ ਮੰਨ ਕੇ, ਸਭ ਨਾਲ ਪਿਆਰ ਕਰਦੇ ਹੋਏ, ਕਰਤਾ ਦਾਤਾਰ ਨੂੰ ਸਮਝ ਕੇ, ਹੰਕਾਰ ਤੋਂ ਬਚਕੇ, ਸੇਵਾ ਕਰਦੇ ਹੋਏ, ਭਰਮ ਭੁਲੇਖਿਆਂ ਤੋਂ ਬਚ ਕੇ ਨਿਰੰਕਾਰ ਨਾਲ ਜੁੜ ਕੇ ਰਹਿਣ ਦੀ ਪ੍ਰੇਰਣਾ ਦਿੱਤੀ।

ਇਸ ਮੌਕੇ ਬਚਿੱਤਰਪਾਲ ਸਿੰਘ ਜੀ ਜੋਨਲ ਇੰਚਾਰਜ ਅਤੇ ਰਤਨ ਲਾਲ ਜੀ ਸੰਯੋਜਕ ਊਧਮਪੁਰ ਨੇ ਆਪਣੇ ਅਤੇ ਸੰਗਤਾਂ ਵੱਲੋਂ ਸਤਿਗੁਰੂ ਮਾਤਾ ਸੁਦੀਕਸ਼ਾ ਜੀ ਮਹਾਰਾਜ ਅਤੇ ਨਿਰੰਕਾਰੀ ਰਾਜਪਿਤਾ ਰਮਿਤ ਜੀ ਦਾ ਊਧਮਪੁਰ (ਜੰਮੂ) ਵਿਖੇ ਪਹੁੰਚਣ ਤੇ ਨਿੱਘਾ ਸਵਾਗਤ ਤੇ ਸ਼ੁਕਰਾਨਾ ਕੀਤਾ। ਉਹਨਾਂ ਸਥਾਨਕ ਪੁਲਿਸ ਪ੍ਰਸਾਸ਼ਨ,ਸਿਵਲ ਪ੍ਰਸਾਸ਼ਨ ਤੇ ਇਲਾਕੇ ਦੇ ਵੱਖ ਵੱਖ ਰਾਜਨੀਤਕ ,ਸਮਾਜਿਕ ਤੇ ਧਾਰਮਿਕ ਸੰਸਥਾਵਾਂ ਦਾ ਭਰਪੂਰ ਸਹਿਯੋਗ ਦੇਣ ਲਈ ਧੰਨਵਾਦ ਕੀਤਾ।