ਫਗਵਾੜਾ (ਲਾਲੀ ਦਾਦਰ )

* ਰਵਾਇਤੀ ਪੋਸ਼ਾਕਾਂ ‘ਚ ਸਜੀਆਂ ਮੁਟਿਆਰਾਂ ਨੇ ਪਾਈ ਧਮਾਲ
* ਗਿੱਧਾ, ਕਿਕਲੀ, ਚਰਖਾ, ਪੀਂਘਾਂ ਰਹੇ ਵਿਸ਼ੇਸ਼ ਖਿੱਚ ਦਾ ਕੇਂਦਰ

23 ਜੁਲਾਈ : ਸਾਉਣ ਮਹੀਨੇ ‘ਚ ਮਨਾਏ ਜਾਣ ਵਾਲੇ ਤੀਆਂ ਦੇ ਤਿਓਹਾਰ ਦਾ ਇੰਤਜਾਰ ਮੁਟਿਆਰਾਂ ਨੂੰ ਸਾਰਾ ਸਾਲ ਰਹਿੰਦਾ ਹੈ। ਸਾਉਣ ਮਹੀਨੇ ‘ਚ ਵਿਆਹੁਤਾ ਮਹਿਲਾਵਾਂ ਖਾਸ ਤੌਰ ਤੇ ਪੇਕੇ ਪਿੰਡ ਆਉਂਦੀਆਂ ਹਨ ਅਤੇ ਆਪਣੀਆਂ ਸਖੀਆਂ, ਸਹੇਲੀਆਂ ਨਾਲ ਪੀਂਘਾ ਝੂਟ ਕੇ ਅਤੇ ਕਿੱਕਲੀ ਪਾ ਕੇ ਪੁਰਾਣੀਆਂ ਯਾਦਾਂ ਨੂੰ ਤਾਜਾ ਕਰਦੀਆਂ ਹਨ। ਅਮੀਰ ਪੰਜਾਬੀ ਵਿਰਸੇ ਦੇ ਇਸ ਤਿਉਹਾਰ ਦੀ ਇਕ ਖੂਬਸੂਰਤ ਝਲਕ ਪਿੰਡ ਲੱਖਪੁਰ ਤਹਿਸੀਲ ਫਗਵਾੜਾ ਵਿਖੇ ਪਿੰਡ ਦੀਆਂ ਸਮੂਹ ਮੁਟਿਆਰਾਂ ਤੇ ਮਹਿਲਾਵਾਂ ਵਲੋਂ ਪੰਚਾਇਤ ਦੇ ਸਹਿਯੋਗ ਸਦਕਾ ਚਾਵਾਂ ਨਾਲ ਮਨਾਏ ਤੀਆਂ ਦੇ ਤਿਓਹਾਰ ਦੌਰਾਨ ਦੇਖਣ ਨੂੰ ਮਿਲੀ। ਸਮਾਗਮ ਦਾ ਸ਼ੁੱਭ ਆਰੰਭ ਬੀਬੀ ਪਿ੍ਰਤਪਾਲ ਕੌਰ ਬੰਗੜ ਪਤਨੀ ਰਿਟਾ. ਪਿ੍ਰੰਸੀਪਲ ਜਸਵਿੰਦਰ ਸਿੰਘ ਬੰਗੜ ਵਲੋਂ ਰਿਬਨ ਕੱਟ ਕੇ ਕੀਤਾ ਗਿਆ। ਉਹਨਾਂ ਸਮੂਹ ਔਰਤਾਂ ਨੂੰ ਤੀਆਂ ਦੀ ਵਧਾਈ ਦਿੱਤੀ ਅਤੇ ਕਿਹਾ ਕਿ ਅਜੋਕੀ ਨੌਜਵਾਨ ਪੀੜ੍ਹੀ ਨੂੰ ਆਪਣੇ ਅਮੀਰ ਵਿਰਸੇ ਨਾਲ ਜੋੜੀ ਰੱਖਣ ਲਈ ਅਜਿਹੇ ਉਪਰਾਲੇ ਵੱਡੀ ਪੱਧਰ ਤੇ ਹੁੰਦੇ ਰਹਿਣੇ ਚਾਹੀਦੇ ਹਨ। ਉਪਰੰਤ ਪਿੰਡ ਦੀਆਂ ਔਰਤਾਂ ਨੇ ਪੰਜਾਬੀ ਸੱਭਿਆਚਾਰ ਦੀ ਜਿੰਦਾ ਮਿਸਾਲ ਪੇਸ਼ ਕਰਦੀਆਂ ਰਵਾਇਤੀ ਪੋਸ਼ਾਂਕਾਂ ਵਿਚ ਸੱਜ ਧੱਜ ਕੇ ਪੀਂਘਾਂ ਝੂਟੀਆਂ। ਮੁਟਿਆਰਾਂ ਨੇ ਕਿਕਲੀ ਪਾਈ। ਔਰਤਾਂ ਨੇ ਚਰਖਾ ਕੱਤ ਕੇ ਤੇ ਦੁੱਧ ਰਿੜਕਦਿਆਂ ਪੁਰਾਤਨ ਪੰਜਾਬੀ ਵਿਰਸੇ ਦੀ ਮੂੰਹ ਬੋਲਦੀ ਝਲਕ ਪੇਸ਼ ਕੀਤੀ। ਇਸ ਤੋਂ ਇਲਾਵਾ ਡੀ.ਜੇ. ਦੀ ਧੁੰਨ ਤੇ ਗਿੱਧਾ, ਕੋਰੀਓਗਰਾਫੀ ਨਾਲ ਔਰਤਾਂ ਨੇ ਮਨ ਪ੍ਰਚਾਵਾ ਕੀਤਾ। ਔਰਤਾਂ ਨੂੰ ਸ਼ਗੁਨ ਦੇ ਤੌਰ ਤੇ ਵੰਗਾਂ, ਡੋਰੀਆਂ ਪਰਾਂਦੇ ਤੇ ਟਿੱਕੇ ਭੇਂਟ ਕੀਤੇ ਗਏ। ਸਮਾਗਮ ਦੌਰਾਨ ਵੱਖ ਵੱਖ ਪਕਵਾਨ ਵੀ ਪਰੋਸੇ ਗਏ। ਬੀਬੀ ਪਿ੍ਰਤਪਾਲ ਕੌਰ ਬੰਗੜ ਅਤੇ ਰਿਟਾ. ਪਿ੍ਰੰਸੀਪਲ ਜਸਵਿੰਦਰ ਸਿੰਘ ਬੰਗੜ ਸਮੇਤ ਹੋਰਨਾਂ ਪਤਵੰਤਿਆਂ ਦਾ ਧੰਨਵਾਦ ਕਰਦਿਆਂ ਬੀਬੀ ਪਰਮਜੀਤ ਕੌਰ ਪੰਚ, ਕਮਲਜੀਤ ਕੌਰ, ਮਨਜੀਤ ਕੌਰ, ਜਸਵਿੰਦਰ ਕੌਰ, ਬਲਜੀਤ ਕੌਰ, ਕਸ਼ਮੀਰ ਕੌਰ ਅਤੇ ਹਰਪ੍ਰੀਤ ਕੌਰ ਨੇ ਮਹਿਮਾਨਾਂ ਨੂੰ ਫੁਲਕਾਰੀਆਂ ਭੇਂਟ ਕਰਕੇ ਸਨਮਾਨਤ ਕੀਤਾ। ਉਹਨਾਂ ਦੱਸਿਆ ਕਿ ਪਿਛਲੇ ਤਿੰਨ ਸਾਲ ਤੋਂ ਲਗਾਤਾਰ ਇਸ ਤਿਓਹਾਰ ਨੂੰ ਮਨਾਇਆ ਜਾ ਰਿਹਾ ਹੈ। ਸਾਮਗ ਦੌਰਾਨ ਸਟੇਜ ਦੀ ਸੇਵਾ ਸੁਖਵਿੰਦਰ ਕੌਰ ਅਤੇ ਕਿਰਨਜੋਤ ਵਲੋਂ ਸਾਂਝੇ ਤੌਰ ਤੇ ਨਿਭਾਈ ਗਈ। ਇਸ ਮੌਕੇ ਨਿਰਮਲਜੀਤ ਸਿੰਘ ਸਰਪੰਚ ਲੱਖਪੁਰ, ਪੰਚਾਇਤ ਮੈਂਬਰ ਅਸ਼ੋਕ ਕੁਮਾਰ, ਜਸਵਿੰਦਰ ਸਿੰਘ, ਚਰਨ ਕੌਰ, ਪਰਮਜੀਤ ਕੌਰ, ਜੋਗਿੰਦਰ ਕੌਰ, ਸਾਬਕਾ ਸਰਪੰਚ ਸਤਵਿੰਦਰ ਸਿੰਘ ਤੋਂ ਇਲਾਵਾ ਹਰਭਜਨ ਕੌਰ, ਮਨਜੀਤ ਕੌਰ, ਸੁਖਵਿੰਦਰ ਕੌਰ ਸੁੱਖੀ, ਗੁਰਮੀਤ ਕੌਰ, ਕਮਲਜੀਤ ਕੌਰ, ਸੰਦੀਪ ਕੌਰ, ਅਮਨ, ਗੁਰਪਾਲ ਕੌਰ, ਨੀਲਮ ਰਾਣੀ ਆਦਿ ਹਾਜਰ ਸਨ।
ਤਸਵੀਰਾਂ ਸਮੇਤ।