ਬਟਾਲਾ, 3 ਦਸੰਬਰ (ਅਵਿਨਾਸ਼ ਸ਼ਰਮਾ)

ਗੁਰਦਾਸਪੁਰ ਰੋਡ ’ਤੇ ਟਰੈਫਿਕ ਇੰਚਾਰਜ ਗੋਰਾਇਆ ਦੀ ਸਖ਼ਤੀ, ਨਾਜਾਇਜ਼ ਪਾਰਕਿੰਗ ’ਤੇ ਕਾਰਵਾਈ ਤੀਬਰ

: ਬਟਾਲਾ ਸ਼ਹਿਰ ਵਿੱਚ ਟਰੈਫਿਕ ਦੀ ਲਗਾਤਾਰ ਵੱਧ ਰਹੀ ਸਮੱਸਿਆ ਨੂੰ ਜੜੋਂ ਸਮੇਤ ਖਤਮ ਕਰਨ ਲਈ ਅੱਜ ਟਰੈਫਿਕ ਇੰਚਾਰਜ ਸੁਰਿੰਦਰ ਸਿੰਘ ਗੋਰਾਇਆ ਨੇ ਜ਼ਬਰਦਸਤ ਇੱਕਸ਼ਨ ਮੋਡ ਵਿੱਚ ਨਜ਼ਰ ਆਏ। ਗੁਰਦਾਸਪੁਰ ਪੁਰ ਰੋਡ ਅਤੇ ਸਿਟੀ ਰੋਡ ’ਤੇ ਉਨ੍ਹਾਂ ਦੀ ਅਗਵਾਈ ਹੇਠ ਤਾਇਨਾਤ ਟਰੈਫਿਕ ਟੀਮ ਵੱਲੋਂ ਵੱਡੇ ਪੱਧਰ ’ਤੇ ਨਾਜਾਇਜ਼ ਪਾਰਕਿੰਗ, ਅੱਡੇ ਅਤੇ ਸੜਕਾਂ ’ਤੇ ਕਬਜ਼ਿਆਂ ਖ਼ਿਲਾਫ਼ ਮੁਹਿੰਮ ਚਲਾਈ ਗਈ।
ਇਸ ਕਾਰਵਾਈ ਦੌਰਾਨ ਜਿੱਥੇ ਕਈ ਵਾਹਨਾਂ ਦੇ ਚਲਾਨ ਕੀਤੇ ਗਏ, ਓਥੇ ਹੀ ਬੇਤਰਤੀਬੀ ਨਾਲ ਖੜ੍ਹੇ ਵਾਹਨਾਂ ਨੂੰ ਤੁਰੰਤ ਹਟਵਾਇਆ ਗਿਆ। ਫੜੀਸਟਾਂ ਨੂੰ ਉਨ੍ਹਾਂ ਦੀ ਨਿਸ਼ਚਿਤ ਹੱਦਾਂ ਵਿੱਚ ਰਹਿੰਦੇ ਹੋਏ ਕਾਰੋਬਾਰ ਕਰਨ ਦੀ ਕੜੀ ਚੇਤਾਵਨੀ ਦਿੱਤੀ ਗਈ, ਤਾਂ ਕਿ ਆਵਾ-ਗਮਨ ਵਿੱਚ ਰੁਕਾਵਟ ਨਾ ਉੱਪਜੇ।

ਇੰਚਾਰਜ ਗੋਰਾਇਆ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ,
ਬਟਾਲਾ ਸ਼ਹਿਰ ਦੇ ਟਰੈਫਿਕ ਨੂੰ ਸੁਧਾਰਨਾ ਸਾਡੀ ਸਭ ਤੋਂ ਵੱਡੀ ਤਰਜੀਹ ਹੈ। ਜੇ ਨਿਯਮਾਂ ਦੀ ਪਾਲਣਾ ਨਹੀਂ ਕੀਤੀ ਗਈ ਤਾਂ ਅਗਲੇ ਦਿਨਾਂ ਵਿੱਚ ਹੋਰ ਵੀ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।”
ਉਨ੍ਹਾਂ ਨੇ ਕਿਹਾ ਕਿ ਕਈ ਥਾਵਾਂ ’ਤੇ ਐਮਬੂਲੈਂਸ ਤਕ ਨੂੰ ਰਸਤਾ ਨਾ ਮਿਲਣ ਦੀਆਂ ਸਥਿਤੀਆਂ ਸਾਹਮਣੇ ਆ ਜਾਂਦੀਆਂ ਹਨ, ਜੋ ਗੰਭੀਰ ਚਿੰਤਾ ਦਾ ਵਿਸ਼ਾ ਹੈ। ਸੜਕਾਂ ਸਿਰਫ਼ ਚਲਣ ਲਈ ਹੁੰਦੀਆਂ ਹਨ, ਨਾਜਾਇਜ਼ ਪਾਰਕਿੰਗ ਜਾਂ ਵਪਾਰ ਲਈ ਨਹੀਂ।
ਸੁਰਿੰਦਰ ਸਿੰਘ ਗੋਰਾਇਆ ਨੇ ਸ਼ਹਿਰ ਦੇ ਵਪਾਰੀਆਂ, ਡਰਾਈਵਰਾਂ ਅਤੇ ਆਮ ਪਬਲਿਕ ਨੂੰ ਸਹਿਯੋਗ ਦੀ ਅਪੀਲ ਕਰਦਿਆਂ ਕਿਹਾ ਕਿ ਟਰੈਫਿਕ ਮੁਹਿੰਮ ਦਾ ਉਦੇਸ਼ ਕਿਸੇ ਨੂੰ ਤੰਗ ਕਰਨਾ ਨਹੀਂ, ਬਲਕਿ ਲੋਕਾਂ ਲਈ ਸੁਚਾਰੂ ਅਤੇ ਸੁਰੱਖਿਅਤ ਯਾਤਰਾ ਸੁਨਿਸ਼ਚਿਤ ਕਰਨਾ ਹੈ।
ਸਥਾਨਕ ਲੋਕਾਂ ਨੇ ਵੀ ਇਸ ਕਾਰਵਾਈ ਦਾ ਸੁਆਗਤ ਕਰਦਿਆਂ ਕਿਹਾ ਕਿ ਜਾਮ ਦੀ ਸਮੱਸਿਆ ਘਟਣ ਨਾਲ ਸ਼ਹਿਰ ਵਿੱਚ ਕੁਝ ਹੱਦ ਤੱਕ ਰਾਹਤ ਮਹਿਸੂਸ ਹੋਈ ਹੈ।
ਟਰੈਫਿਕ ਇੰਚਾਰਜ ਗੋਰਾਇਆ ਨੇ ਦਾਅਵਾ ਕੀਤਾ ਕਿ ਜੇਕਰ ਨਿਯਮਾਂ ਦੀ ਪਾਲਣਾ ਕੀਤੀ ਗਈ ਤਾਂ ਬਟਾਲਾ ਨੂੰ ਜਲਦੀ ਹੀ ਟਰੈਫਿਕ ਸਮੱਸਿਆ ਤੋਂ ਪੂਰੀ ਤਰ੍ਹਾਂ ਮੁਕਤ ਕੀਤਾ ਜਾ ਸਕੇਗਾ।