ਬਟਾਲਾ, 18 ਅਪ੍ਰੈਲ (ਅਵਿਨਾਸ਼ ਸ਼ਰਮਾ)
— ਭਗਵਾਨ ਪਰਸ਼ੁਰਾਮ ਮੰਦਰ, ਬਾਹਰ ਬਾਰ ਅਚਲੀ ਗੇਟ ਅਤੇ ਸ਼੍ਰੀ ਬ੍ਰਾਹਮਣ ਸਭਾ ਬਟਾਲਾ ਵੱਲੋਂ ਭਗਵਾਨ ਪਰਸ਼ੁਰਾਮ ਜੀ ਦੇ ਪ੍ਰਗਟ ਉਤਸਵ ਅਤੇ ਅਕਸ਼ਯ ਤ੍ਰਿਤੀਆ ਨੂੰ ਸਮਰਪਿਤ ਸ਼ਾਨਦਾਰ ਪ੍ਰਭਾਤ ਫੇਰੀ ਦਾ ਆਯੋਜਨ ਕੀਤਾ ਗਿਆ।
ਇਹ ਪ੍ਰਭਾਤ ਫੇਰੀ ਭਗਵਾਨ ਪਰਸ਼ੁਰਾਮ ਮੰਦਰ ਅਚਲੀ ਗੇਟ ਤੋਂ ਆਰੰਭ ਹੋ ਕੇ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਹੁੰਦੀ ਹੋਈ ਮੁੜ ਮੰਦਰ ਪ੍ਰੰਗਣ ਵਿੱਚ ਆ ਕੇ ਸੰਪੰਨ ਹੋਈ। ਇਸ ਦੌਰਾਨ ਪੂਰਾ ਸ਼ਹਿਰ ਭਜਨਾਂ ਦੀ ਗੂੰਜ ਅਤੇ ਭਗਤੀ ਭਾਵ ਨਾਲ ਰੰਗਿਆ ਹੋਇਆ ਨਜ਼ਰ ਆਇਆ।
ਮੰਦਰ ਪ੍ਰੰਗਣ ਵਿੱਚ ਇਸ ਮੌਕੇ ਚੇਅਰਮੈਨ ਵਿਜੈ ਪ੍ਰਭਾਕਰ ਵੱਲੋਂ ਭਗਵਾਨ ਜੀ ਦੇ ਸਮੱਖ ਜੋਤ ਪ੍ਰਜਵਲਿਤ ਕਰਕੇ ਪ੍ਰਭਾਤ ਫੇਰੀ ਨੂੰ ਰਵਾਨਾ ਕੀਤਾ ਗਿਆ। ਰਸਤੇ ਵਿੱਚ ਵੱਖ-ਵੱਖ ਮੰਦਰਾਂ ਅਤੇ ਨਗਰ ਨਿਵਾਸੀਆਂ ਵੱਲੋਂ ਫੁੱਲਾਂ ਦੀ ਵਰਖਾ ਕਰਕੇ ਪ੍ਰਭਾਤ ਫੇਰੀ ਦਾ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ ਗਿਆ।
ਭਗਤਾਂ ਵੱਲੋਂ ਭਜਨਾਂ ਰਾਹੀਂ ਭਗਵਾਨ ਪਰਸ਼ੁਰਾਮ ਜੀ ਦਾ ਗੁਣਗਾਨ ਕੀਤਾ ਗਿਆ, ਜਿਸ ਨਾਲ ਪੂਰਾ ਵਾਤਾਵਰਣ ਭਗਤੀ ਰਸ ਵਿੱਚ ਡੁੱਬ ਗਿਆ।
ਇਸ ਮੌਕੇ ਸ਼੍ਰੀ ਬ੍ਰਾਹਮਣ ਸਭਾ ਬਟਾਲਾ ਦੇ ਪ੍ਰਧਾਨ ਰਾਜੇਸ਼ ਸ਼ਰਮਾ ਨੇ ਸਾਰੇ ਨਗਰ ਨਿਵਾਸੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਭਗਵਾਨ ਪਰਸ਼ੁਰਾਮ ਜਯੰਤੀ ਅਤੇ ਅਕਸ਼ਯ ਤ੍ਰਿਤੀਆ ਦਾ ਪਾਵਨ ਪੁਰਬ 19 ਅਪ੍ਰੈਲ, ਐਤਵਾਰ ਨੂੰ ਸਵੇਰੇ 9:00 ਵਜੇ 21 ਕੁੰਡੀਆ ਹਵਨ ਯਜ ਨਾਲ ਭਗਵਾਨ ਪਰਸ਼ੁਰਾਮ ਮੰਦਰ ਅਚਲੀ ਗੇਟ ਵਿੱਚ ਮਨਾਇਆ ਜਾ ਰਿਹਾ ਹੈ।
ਉਨ੍ਹਾਂ ਸਾਰੇ ਨਗਰ ਨਿਵਾਸੀਆਂ ਨੂੰ ਅਪੀਲ ਕੀਤੀ ਕਿ ਇਸ ਪਵਿੱਤਰ ਦਿਨ ‘ਤੇ ਜਪ, ਤਪ, ਦਾਨ ਅਤੇ ਹਵਨ ਯਜ ਕਰਕੇ ਅਕਸ਼ਯ ਪੁਣਯ ਦੀ ਪ੍ਰਾਪਤੀ ਲਈ ਪ੍ਰਾਰਥਨਾ ਕਰਨ ਅਤੇ ਸਮਾਜ ਵਿੱਚ ਫੈਲ ਰਹੀਆਂ ਕੁਰੀਤੀਆਂ ਨੂੰ ਦੂਰ ਕਰਨ ਦਾ ਸੰਕਲਪ ਲੈਣ।
ਇਸ ਸਮਾਗਮ ਵਿੱਚ ਅਜੇ ਸ਼ਰਮਾ, ਰਮਨ ਸ਼ਰਮਾ, ਨਰੇਂਦਰ ਤ੍ਰਿਪਾਠੀ, ਦੀਪਕ ਸ਼ਰਮਾ, ਡਾ. ਬਾਬੂਰਾਮ, ਨਰੇਂਦਰ ਸਿੰਘ, ਰਮੇਸ਼ ਅਗਰਵਾਲ, ਰਾਜਪਾਲ ਸ਼ਰਮਾ, ਮਨੋਜ ਸ਼ਰਮਾ, ਅਰਚਿਤ ਸ਼ਰਮਾ ਸਮੇਤ ਵੱਡੀ ਗਿਣਤੀ ਵਿੱਚ ਸ਼ਰਧਾਲੂ, ਮਾਤਾਵਾਂ ਅਤੇ ਭੈਣਾਂ ਨੇ ਭਾਗ ਲਿਆ।
ਪੂਰਾ ਸ਼ਹਿਰ ਇਸ ਮੌਕੇ ਭਗਤੀ ਅਤੇ ਆਧਿਆਤਮਿਕ ਉਤਸ਼ਾਹ ਨਾਲ ਝੂਮ ਉਠਿਆ।
