ਪਹਿਲੀਆਂ ਪੁਜ਼ੀਸ਼ਨਾਂ ਪ੍ਰਾਪਤ ਕਰਨ ਵਾਲੇ ਹੋਣਹਾਰ ਵਿਦਿਆਰਥੀਆਂ ਦਾ ਸਕੂਲ ਪ੍ਰਬੰਧਕਾਂ ਵਲੋਂ ਸਨਮਾਨ

ਬਲਾਚੌਰ 6 ਅਪ੍ਰੈਲ (ਜਤਿੰਦਰ ਪਾਲ ਸਿੰਘ ਕਲੇਰ ) : ਸਰਕਾਰੀ ਮਿਡਲ ਸਕੂਲ ਮੰਗੂਪੁਰ ਵਿਖੇ ਹੋਈ ਮਾਪੇ-ਅਧਿਆਪਕ ਮਿਲਣ ਮੌਕੇ ਵੱਖ-ਵੱਖ ਜਮਾਤਾਂ ‘ਚੋਂ ਪਹਿਲੀਆਂ ਪੁਜ਼ੀਸ਼ਨਾਂ ਪ੍ਰਾਪਤ ਕਰਨ ਵਾਲੇ ਵਿਦਿਆਰਥੀਆਂ ਦਾ ਸਕੂਲ ਪ੍ਰਬੰਧਕਾਂ ਵਲੋਂ ਸਨਮਾਨ ਕੀਤਾ ਗਿਆ | ਸਮਾਗਮ ਦੀ ਪ੍ਰਧਾਨਗੀ ਠੇਕੇਦਾਰ ਰੌਸ਼ਨ ਲਾਲ ਸਮਾਣਾ ਤੇ ਕਮੇਟੀ ਦੇ ਚੇਅਰਮੈਨ ਪ੍ਰਵੀਨ ਕੁਮਾਰ ਨੇ ਕਰਦਿਆਂ ਕਿਹਾ ਕਿ ਨਤੀਜੇ ਵਾਲਾ ਦਿਨ ਹਰ ਵਿਅਕਤੀ ਖ਼ਾਸ ਕਰਕੇ ਬੱਚਿਆਂ ਲਈ ਅਹਿਮ ਦਿਨ ਹੁੰਦਾ ਹੈ | ਇਸ ਮੌਕੇ ਉਨ੍ਹਾਂ ਕਿਹਾ ਕਿ ਜਿਨ੍ਹਾਂ ਬੱਚਿਆਂ ਨੇ ਵੱਖ-ਵੱਖ ਜਮਾਤਾਂ ‘ਚ ਅੱਜ ਮੱਲ੍ਹਾਂ ਮਾਰੀਆਂ ਜਾਂ ਪਹਿਲੀ ਕਤਾਰ ਵਿਚ ਆਉਣ ਤੋਂ ਕੁਝ ਪਛੜ ਗਏ ਹਨ, ਉਹ ਅਵੇਸਲੇ ਨਾ ਪੈਣ, ਸਗੋਂ ਪਹਿਲਾ ਨਾਲੋਂ ਹੋਰ ਵੀ ਸਖ਼ਤ ਮਿਹਨਤ ਕਰਨ, ਤਾਂ ਜੋ ਉਹ ਆਪਣੇ ਮੰਤਵ ਦੀ ਪ੍ਰਾਪਤੀ ਆਸਾਨੀ ਨਾਲ ਕਰ ਸਕਣ | ਇਸ ਮੌਕੇ ਸਕੂਲ ਦੇ ਇੰਚਾਰਜ ਮਾ. ਬਲਵਿੰਦਰ ਸਿੰਘ ਨੇ ਸਕੂਲ ‘ਚ ਪਹੁੰਚੇ ਮਾਪਿਆਂ ਤੇ ਪ੍ਰਮੁੱਖ ਸ਼ਖ਼ਸੀਅਤਾਂ ਨੂੰ ਜੀ ਆਇਆ ਆਖਦਿਆਂ ਸਕੂਲ ਦੀਆਂ ਪ੍ਰਾਪਤੀਆਂ ਤੇ ਸਕੂਲ ਦੇ ਭਵਿੱਖ ਦੇ ਪ੍ਰੋਗਰਾਮ ਬਾਰੇ ਜਾਣੂ ਕਰਵਾਇਆ | ਇਸ ਮੌਕੇ ਸਕੂਲ ਪ੍ਰਬੰਧਕਾਂ ਵਲੋਂ ਵੱਖ-ਵੱਖ ਜਮਾਤਾਂ ‘ਚ ਪੜ੍ਹਦੇ ਵਿਦਿਆਰਥੀਆਂ ਨੂੰ ਸਨਮਾਨ ਚਿੰਨ੍ਹ ਤੇ ਸਟੇਸ਼ਨਰੀ ਦੇ ਕੇ ਸਨਮਾਨਿਤ ਵੀ ਕੀਤਾ ਗਿਆ | ਇਸ ਮੌਕੇ ਚੌਧਰੀ ਤੇਲੂ ਰਾਮ ਪੰਚ, ਪਰਮਾ ਨੰਦ, ਚੌਧਰੀ ਮਨੋਜ ਕੁਮਾਰ, ਪਵਨਜੀਤ, ਪ੍ਰਵੀਨ ਕੁਮਾਰ ਚੇਅਰਮੈਨ, ਮਾ. ਬਲਵਿੰਦਰ ਸਿੰਘ, ਮਾ. ਕੁਲਦੀਪ ਕੁਮਾਰ, ਰਿੰਪੀ ਰਾਣੀ, ਰੀਨਾ ਕੁਮਾਰੀ, ਆਸ਼ਾ ਰਾਣੀ, ਡਿੰਪਲ ਤੇ ਸੋਹਣ ਲਾਲ ਆਦਿ ਵੀ ਹਾਜ਼ਰ ਸਨ |