ਸੱਲ ਕਲਾਂ ਕਤਲ ਕੇਸ ਵਿੱਚ ਪੁਲਿਸ ਨੂੰ ਅਗਲੇਰੀ ਸਫਲਤਾ – ਬਾਕੀ ਰਹਿੰਦੇ 02 ਦੋਸ਼ੀ ਵੀ ਗ੍ਰਿਫਤਾਰ

ਨਵਾਂਸ਼ਹਿਰ (ਜਤਿੰਦਰ ਪਾਲ ਸਿੰਘ ਕਲੇਰ ) ਸੰਦੀਪ ਕੁਮਾਰ ਸ਼ਰਮਾ ਪੀ.ਪੀ.ਐਸ ਸੀਨੀਅਰ ਪੁਲਿਸ ਕਪਤਾਨ ਸ਼ਹੀਦ ਭਗਤ ਸਿੰਘ ਨਗਰ ਜੀ ਦੀ ਅਗਵਾਈ ਵਿੱਚ ਜ਼ਿਲ੍ਹਾ ਪੁਲਿਸ ਵੱਲੋਂ ਸੱਲ ਕਲਾਂ ਕਤਲ ਮਾਮਲੇ ਵਿੱਚ ਮ੍ਰਿਤਕ ਤੇ ਗੋਲ‌ੀਆ ਚਲਾਉਣ ਵਾਲੇ ਬਾਕੀ ਰਹਿੰਦੇ ਦੋਨਾਂ ਦੋਸ਼ੀਆਂ ਨੂੰ ਵੀ ਗ੍ਰਿਫ਼ਤਾਰ ਕਰਕੇ ਮਾਮਲਾ ਪੂਰੀ ਤਰ੍ਹਾਂ ਸੁਲਝਾ ਲਿਆ ਗਿਆ। ਇਸ ਸਬੰਧੀ ਸੀਨੀਅਰ ਪੁਲਿਸ ਕਪਤਾਨ ਸ਼ਹੀਦ ਭਗਤ ਸਿੰਘ ਨਗਰ ਵੱਲੋਂ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਇਸ ਮਾਮਲੇ ਵਿੱਚ ਪਹਿਲਾਂ ਗ੍ਰਿਫ਼ਤਾਰ ਕੀਤੇ ਮ੍ਰਿਤਕ ਦੀ ਭੈਣ ਮੰਨਦੀਪ ਕੌਰ ਨੇ ਖੁਲਾਸਾ ਕੀਤਾ ਸੀ ਕਿ ਉਸ ਦਾ ਆਪਣੇ ਪਤੀ ਨਾਲ ਤਲਾਕ ਹੋਣ ਤੋਂ ਬਾਅਦ ਉਹ ਆਪਣੇ ਪੇਕੇ ਘਰ ਪਿੰਡ ਸੱਲ ਕਲਾਂ ਹੀ ਰਹਿੰਦੀ ਸੀ। ਉਸ ਦਾ ਭਰਾ ਅਮਰਜੀਤ ਸਿੰਘ ਜੋ ਸ਼ਰਾਬ ਪੀਣ ਦਾ ਆਦੀ ਸੀ ਉਸ ਨਾਲ ਕੁੱਟ ਮਾਰ ਕਰਦਾ ਸੀ ਜਿਸ ਦੀਆਂ ਆਦਤਾਂ ਤੋਂ ਤੰਗ ਹੋ ਕੇ ਅਤੇ ਆਪਣੇ ਪਿਤਾ ਵੱਲੋਂ ਆਪਣੀ ਜੱਦੀ ਜ਼ਮੀਨ ਜੋ ਕਿ ਪਹਿਲਾਂ ਮਨਦੀਪ ਕੌਰ ਦੇ ਨਾਮ ਤੇ ਕਰ ਦਿੱਤੀ ਸੀ ਜੋ ਉਸ ਨੂੰ ਹੁਣ ਡਰ ਸੀ ਕਿ ਉਸ ਦਾ ਪਿਤਾ ਇਹ ਜ਼ਮੀਨ ਦੁਆਰਾ ਉਸ ਦੇ ਭਰਾ ਅਮਰਜੀਤ ਸਿੰਘ ਦੇ ਨਾਮ ਕਰ ਸਕਦਾ ਹੈ, ਜਿਸ ਕਰਕੇ ਮੰਨਦੀਪ ਕੌਰ ਨੇ ਆਪਣੀ ਸਹੇਲੀ ਗੁਰਵਿੰਦਰ ਕੌਰ ਵਾਸੀ ਚਰਾਣ ਨਾਲ ਮਿਲੀ ਭੁਗਤ ਕਰਕੇ ਆਪਣੇ ਭਰਾ ਅਮਰਜੀਤ ਸਿੰਘ ਦਾ ਕਤਲ ਕਰਵਾਉਣ ਲਈ ਗੱਲਬਾਤ ਕੀਤੀ ਜਿਸ ਤੇ ਗੁਰਵਿੰਦਰ ਕੌਰ ਨੇ ਅੱਗੇ ਆਪਣੀ ਜਾਣ-ਪਹਿਚਾਣ ਦੇ ਲਖਵੀਰ ਕੁਮਾਰ ਵਾਸੀ ਮਹਿਮੂਦਪੁਰ ਗਾਦੜੀਆਂ ਨਾਲ ਗੱਲ ਕੀਤੀ ਜੋ ਲਖਵੀਰ ਕੁਮਾਰ ਨੇ ਅੱਗੇ ਅਮਰਜੀਤ ਸਿੰਘ ਦਾ ਕਤਲ ਕਰਨ ਲਈ ਸਰਬਜੀਤ ਸਿੰਘ ਸਾਬੀ ਪੁੱਤਰ ਸੱਤਪਾਲ ਵਾਸੀ ਪਿੰਡ ਚਰਾਣ ਨਾਲ ਗੱਲ ਕੀਤੀ। ਗੱਲਬਾਤ ਮੁਤਾਬਿਕ ਸਰਬਜੀਤ ਸਾਬੀ ਨੇ ਅਮਰਜੀਤ ਸਿੰਘ ਦਾ ਕਤਲ ਕਰਨ ਦੇ ਬਦਲੇ 75,000/-ਰੁਪਏ ਦੀ ਮੰਗ ਕੀਤੀ ਅਤੇ ਬਣਾਈ ਗਈ ਸਲਾਹ ਮੁਤਾਬਿਕ ਸਰਬਜੀਤ ਸਾਬੀ ਨੇ ਮਿਤੀ 25/05/2022 ਨੂੰ ਆਪਣੇ ਇੱਕ ਅਣ-ਪਛਾਤੇ ਦੋਸਤ ਨਾਲ ਮਿਲ ਕੇ ਆਪਣੇ ਮੋਟਰ ਸਾਈਕਲ ਤੇ ਸਵਾਰ ਹੋ ਕੇ ਮ੍ਰਿਤਕ ਅਮਰਜੀਤ ਸਿੰਘ ਨੂੰ ਉਸ ਦੇ ਘਰ ਪਿੰਡ ਸੱਲ ਕਲਾਂ ਤੋਂ ਬਹਾਨੇ ਨਾਲ ਬੁਲਾ ਕੇ ਪਿੰਡ ਬਾਲੋਂ ਰੋਡ ਤੇ ਉਸ ਦਾ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਤੇ ਉਸ ਦੀ ਭੈਣ ਮੰਨਦੀਪ ਕੌਰ ਪਾਸੋਂ 40,000/-ਰੁਪਏ ਹਾਸਲ ਕਰ ਲਏ। ਇਸ ਤੋਂ ਇਲਾਵਾ ਮੰਨਦੀਪ ਕੌਰ ਨੇ ਸਰਬਜੀਤ ਸਿੰਘ ਸਾਬੀ ਨੂੰ ਜੋ 35,000/- ਰੁਪਏ ਅਜੇ ਹੋਰ ਦੇਣੇ ਸਨ ਉਹ ਵੀ ਮਨਦੀਪ ਕੌਰ ਪਾਸੋਂ ਬ੍ਰਾਮਦ ਕੀਤੇ ਜਾ ਚੁੱਕੇ ਹਨ। ਗੁਰਵਿੰਦਰ ਕੌਰ ਰਾਹੀਂ ਲਖਵੀਰ ਸਿੰਘ ਨੂੰ ਵੀ 20,000/-ਰੁਪਏ ਇਸ ਕੰਮ ਲਈ ਦਿੱਤੇ ਸਨ ਜਿਸ ਵਿੱਚੋਂ 10,000/-ਰੁ: ਵੀ ਬ੍ਰਾਮਦ ਕਰ ਲਏ ਗਏ ਸਨ।
ਮੁਕੱਦਮਾ ਵਿੱਚ ਨਾਮਜ਼ਦ ਦੋਸ਼ੀ ਗੁਰਵਿੰਦਰ ਕੌਰ ਅਤੇ ਲਖਵੀਰ ਕੁਮਾਰ ਨੂੰ ਗ੍ਰਿਫਤਾਰ ਕਰਕੇ ਮਿਤੀ 02-06-2022 ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ 05 ਦਿਨ ਦਾ ਪੁਲਿਸ ਰਿਮਾਂਡ ਹਾਸਲ ਕੀਤਾ ਗਿਆ ਸੀ। ਦੋਰਾਨੇ ਰਿਮਾਂਡ ਦੋਸ਼ੀਆਂ ਦੀ ਪੁੱਛਗਿੱਛ ਦੇ ਅਧਾਰ ਤੇ ਪੁਲਿਸ ਵੱਲੋਂ ਅਮਰਜੀਤ ਸਿੰਘ ਤੇ ਗੋਲੀਆ ਚਲਾਉਣ ਵਾਲੇ ਦੋਵੇ ਮੋਟਰਸਾਈਕਲ ਸਵਾਰ ਦੋਸ਼ੀਆਂ ਸਰਬਜੀਤ ਸਿੰਘ ਉਰਫ ਸਾਬੀ ਵਾਸੀ ਚਰਾਣ ਅਤੇ ਸੰਜੇ ਕੁਮਾਰ ਉਰਫ ਸੰਜੂ ਪਿੰਡ ਕੰਗਣਾ ਬੇਟ ਨੂੰ ਵੀ ਮੁਕੱਦਮਾ ਵਿੱਚ ਗ੍ਰਿਫਤਾਰ ਕੀਤਾ ਗਿਆ ਹੈ, ਜਿਹਨਾਂ ਪਾਸੋ ਵਾਰਦਾਤ ਦੋਰਾਨ ਵਰਤਿਆ ਪਿਸਟਲ ਅਤੇ ਮੋਟਰਸਾਈਕਲ ਨੰਬਰ PB32-AB-3885 ਮਾਰਕਾ ਸਪਲੈਂਡਰ ਵੀ ਬ੍ਰਾਮਦ ਕੀਤਾ ਗਿਆ ਹੈ।ਦੋਸ਼ੀਆ ਨੂੰ ਅੱਜ ਮਾਨਯੋਗ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ। ਮੁਕੱਦਮਾ ਵਿੱਚ ਅਗਲੇਰੀ ਤਫਤੀਸ਼ ਜਾਰੀ ਹੈ।