ਪਿੰਡ ਚਾਂਦਪੁਰ ਰੁੜਕੀ ਦੀ ਧੀ ਅਦਿਤੀ ਚੌਹਾਨ ਨੇ ਸੀ.ਬੀ. ਐਸ.ਈ. ਦਸਵੀਂ ਜਮਾਤ ਵਿਚੋਂ 99.6 ਫੀਸਦੀ ਅੰਕਾਂ ਨਾਲ ਪੰਜਾਬ ਵਿਚੋਂ ਟਾਪ ਕਰਕੇ ਮਾਪਿਆਂ ਤੇ ਇਲਾਕੇ ਦਾ ਨਾਂਅ ਰੌਸ਼ਨ ਕੀਤਾ

ਬਲਾਚੌਰ, 25 ਜੁਲਾਈ (ਜਤਿੰਦਰ ਪਾਲ ਸਿੰਘ ਕਲੇਰ )– ਪਿੰਡ ਚਾਂਦਪੁਰ ਰੁੜਕੀ ਦੀ ਹੋਣਹਾਰ ਧੀ ਅਦਿਤੀ ਚੌਹਾਨ ਪੁੱਤਰ ਰਵੀ ਚੌਹਾਨ ਨੇ ਸੀ.ਬੀ.ਐੱਸ.ਈ ਬੋਰਡ ਵਲੋਂ ਐਲਾਨੇ ਗਏ ਦਸਵੀਂ ਜਮਾਤ ਦੇ ਨਤੀਜਿਆਂ ਵਿਚ 99.6 ਫੀਸਦੀ ਅੰਕ ਪ੍ਰਾਪਤ ਕਰਕੇ ਜਿੱਥੇ ਆਪਣੇ ਮਾਪਿਆਂ ਦਾ ਨਾਂਅ ਰੌਸ਼ਨ ਕੀਤਾ ਹੈ | ਉਨ੍ਹਾਂ ਨਾਲ ਹੀ ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ, ਕੰਢੀ ਇਲਾਕੇ, ਗੁੱਜਰ ਸਮਾਜ ਤੇ ਪਿੰਡ ਚਾਂਦਪੁਰ ਰੁੜਕੀ ਦਾ ਨਾਂਅ ਵੀ ਰੌਸ਼ਨ ਕੀਤਾ ਹੈ | ਇਸ ਸਬੰਧੀ ਅਦਿਤੀ ਚੌਹਾਨ ਦੇ ਪਿਤਾ ਰਵੀ ਚੌਹਾਨ ਨੇ ਦੱਸਿਆ ਕਿ ਉਹ ਪੰਜਾਬ ਸਿਵਲ ਸਕੱਤਰੇਤ ਵਿਚ ਨੌਕਰੀ ਕਰਦੇ ਹਨ ਤੇ ਅਦਿਤੀ ਚੌਹਾਨ ਦੀ ਮਾਤਾ ਅਧਿਆਪਕਾਂ ਹਨ ਤੇ ਉਹ ਪਰਿਵਾਰ ਸਮੇਤ ਮੋਹਾਲੀ ਵਿਖੇ ਰਹਿੰਦੇ ਹਨ ਤੇ ਅਦਿਤੀ ਚੌਹਾਨ ਇੱਥੇ ਹੀ ਪੜ੍ਹਾਈ ਕਰ ਰਹੀ ਹੈ | ਉਨ੍ਹਾਂ ਦੱਸਿਆ ਕਿ ਇਸ ਵਾਰ ਸੀ.ਬੀ.ਐਸ.ਈ. ਬੋਰਡ ਦਸਵੀਂ ਜਮਾਤ ਵਿਚੋਂ ਉਨ੍ਹਾਂ ਦੀ ਧੀ ਅਦਿਤੀ ਚੌਹਾਨ ਨੇ ਪੂਰੇ ਪੰਜਾਬ ਵਿਚੋਂ ਟਾਪ ਕਰਦੇ ਹੋਏ 500 ਅੰਕਾਂ ਵਿਚੋਂ 498 ਅੰਕ ਪ੍ਰਾਪਤ ਕੀਤੇ ਹਨ | ਉਨ੍ਹਾਂ ਦੱਸਿਆ ਕਿ ਅਦਿਤੀ ਪਹਿਲਾ ਵੀ 99 ਫੀਸਦੀ ਤੋਂ ਵੱਧ ਅੰਕ ਪ੍ਰਾਪਤ ਕਰਦੀ ਰਹੀ ਹੈ | ਇਸ ਸਬੰਧੀ ਅਦਿਤੀ ਚੌਹਾਨ ਨੇ ਦੱਸਿਆ ਕਿ ਉਸ ਦਾ ਮੁੱਖ ਸ਼ੌਕ ਕੇਵਲ ਪੜ੍ਹਾਈ ਕਰਨਾ ਹੀ ਹੈ ਤੇ ਉਹ ਆਈ.ਏ.ਐਸ. ਬਣਨਾ ਚਾਹੁੰਦੀ ਹੈ | ਜ਼ਿਕਰਯੋਗ ਹੈ ਕਿ ਚਾਂਦਪੁਰ ਰੁੜਕੀ ਪਿੰਡ ਹਮੇਸ਼ਾ ਸਿੱਖਿਆਂ ਪੱਖੋਂ ਮੋਹਰੀ ਪਿੰਡ ਰਿਹਾ ਹੈ ਤੇ ਸਭ ਤੋਂ ਵੱਧ ਪੜ੍ਹੇ ਲਿਖੇ ਤੇ ਉਚ ਦਰਜੇ ਤੇ ਤਾਇਨਾਤ ਸਭ ਤੋ ਵੱਧ ਸਰਕਾਰੀ ਮੁਲਾਜ਼ਮਾਂ ਵਾਲਾ ਨਗਰ ਹੈ | ਮਹਾਵੀਰ ਚੱਕਰ ਬਿ੍ਗੇਡੀਅਰ ਕੁਲਦੀਪ ਸਿੰਘ ਚਾਂਦਪੁਰੀ, ਏਅਰ ਮਾਰਸ਼ਲ ਜਗਜੀਤ ਸਿੰਘ, ਆਈ.ਏ.ਐਸ. ਅਧਿਕਾਰੀ ਹਿੰਮਤ ਸਿੰਘ ਤੇ ਹੋਰ ਵੱਖ-ਵੱਖ ਉੱਚ ਅਧਿਕਾਰੀ ਇਸ ਪਿੰਡ ਵਿਚ ਹੋਏ ਹਨ |