ਮੱਤੇਵਾੜਾ ਜੰਗਲ ਬਚਾਉਣ ਲਈ ਬੀੜ ਸੁਸਾਇਟੀ ਬਲਾਚੌਰ ਹਰ ਸੰਭਵ ਯਤਨ ਕਰੇਗੀ- ਅਮਨ ਵਰਮਾ

ਬਲਾਚੌਰ, 10 ਜੁਲਾਈ (ਜਤਿੰਦਰ ਪਾਲ ਸਿੰਘ ਕਲੇਰ )- ਮੱਤੇਵਾੜਾ ਦੇ ਵਿਸ਼ਾਲ ਜੰਗਲ ਨੂੰ ਬਚਾਉਣ ਲਈ ਅੱਜ ਜਿੱਥੇ ਪੰਜਾਬ ਹੀ ਨਹੀਂ ਦੇਸ਼ ਵਿਦੇਸ਼ਾਂ ਤੋਂ ਵਾਤਾਵਰਨ ਪ੍ਰੇਮੀ ਮੱਤੇਵਾੜਾ ਪਹੁੰਚੇ ਉੱਥੇ ਬਲਾਚੌਰ ਤੋਂ ਬੀੜ ਸੁਸਾਇਟੀ ਦੇ ਸੰਚਾਲਕ ਅਮਨ ਵਰਮਾ ਇਕ ਵਿਸ਼ੇਸ਼ ਵਫ਼ਦ ਨਾਲ ਬਲਾਚੌਰ ਤੋਂ ਹਾਜ਼ਰੀ ਲੁਆਈ | ਉਨ੍ਹਾਂ ਉੱਥੇ ਜਾ ਕੇ ਫ਼ੋਨ ਤੇ ਜਾਣਕਾਰੀ ਦਿੱਤੀ ਕਿ ਜਿਸ ਤਰ੍ਹਾਂ ਕਿਰਤੀ ਕਿਸਾਨ ਦਿਲੀ ਵਿਖੇ ਆਪਣੇ ਹੱਕਾਂ ਲਈ ਲਾਮਬੰਦ ਹੋਏ ਉਸੇ ਤਰਾਂ ਦਾ ਮਾਹੌਲ ਅੱਜ ਮੱਤੇਵਾੜਾ ਦੀ ਧਰਤੀ ਤੇ ਦੇਖਣ ਨੂੰ ਮਿਲਿਆ | ਉਨ੍ਹਾਂ ਕਿਹਾ ਕਿ ਇਸ ਜੰਗਲ ਨੂੰ ਬਚਾਉਣ ਲਈ ਬੀੜ ਸੁਸਾਇਟੀ ਬਲਾਚੌਰ ਵਲੋਂ ਹਰ ਪ੍ਰਕਾਰ ਦਾ ਸਹਿਯੋਗ ਦਿੱਤਾ ਜਾਵੇਗਾ | ਇੱਥੇ ਜ਼ਿਕਰਯੋਗ ਹੈ ਕਿ ਅਮਨ ਵਰਮਾ, ਸੁਨੀਤਾ ਚੈਰੀਟੇਬਲ ਹਸਪਤਾਲ ਦੀ ਮੁੱਖ ਸੰਚਾਲਕਾ ਸੁਨੀਤਾ ਸ਼ਰਮਾ ਅਤੇ ਹੋਰ ਵਾਤਾਵਰਨ ਪ੍ਰੇਮੀ ਜੰਗਲ ਬਚਾਉਣ ਲਈ ਬਲਾਚੌਰ ਹੀ ਨਹੀਂ ਸਗੋਂ ਰੋਪੜ, ਹੁਸ਼ਿਆਰਪੁਰ, ਨਾਲਾਗੜ੍ਹ ਵਿਖੇ ਵੀ ਆਪਣੇ ਵਲੰਟੀਅਰਾਂ ਨਾਲ ਦਿਨ ਰਾਤ ਇਕ ਕਰ ਰਹੇ ਹਨ |