ਛੱਪੜ ‘ਚ ਆਏ ਕਰੰਟ ਨਾਲ ਗੁੱਜਰਾਂ ਦੀਆਂ 5 ਮੱਝਾਂ ਤੇ ਇਕ ਗਾਂ ਦੀ ਮੌਤ

ਗੜ੍ਹਸ਼ੰਕਰ, 22 ਜੂਨ (ਜਤਿੰਦਰ ਪਾਲ ਸਿੰਘ ਕਲੇਰ ) ਪਿੰਡ ਚੱਕ ਗੁਰੂ ਵਿਖੇ ਬਿਜਲੀ ਦੇ ਟਰਾਂਸਫ਼ਾਰਮਰ ਨਾਲ਼ ਛੱਪੜ ‘ਚ ਕਰੰਟ ਆ ਜਾਣ ਕਰਕੇ ਇਸ ਵਿਚ ਵੜੀਆਂ ਇਕ ਗੁੱਜਰ ਪਰਿਵਾਰ ਦੀਆਂ 5 ਮੱਝਾਂ ਤੇ ਇਕ ਗਾਂ ਦੇ ਮਰ ਜਾਣ ਦੀ ਖ਼ਬਰ ਹੈ | ਜਾਣਕਾਰੀ ਦਿੰਦਿਆਂ ਸਦਰਦੀਨ ਪੁੱਤਰ ਬੀਰੂ ਵਾਸੀ ਸਮੁੰਦੜਾ ਥਾਣਾ ਗੜ੍ਹਸ਼ੰਕਰ ਜ਼ਿਲ੍ਹਾ ਹੁਸ਼ਿਆਰਪੁਰ ਨੇ ਦੱਸਿਆ ਕਿ ਉਸ ਦਾ 16 ਸਾਲਾ ਪੁੱਤਰ ਭਾਊ ਤੇ ਲੜਕੀ ਸ਼ਬਾਨਾ ਮੱਝਾਂ ਚਾਰਦੇ ਹੋਏ ਸਮੁੰਦੜਾ ਤੋਂ ਚੱਕ ਗੁਰੂ ਵੱਲ ਨੂੰ ਆ ਗਏ ਤੇ ਜਦੋਂ ਉਹ 10 ਵਜੇ ਦੇ ਕਰੀਬ ਪਿੰਡ ਦੇ ਲਹਿੰਦੇ ਪਾਸੇ ਗੰਦੇ ਪਾਣੀ ਦੇ ਇਕ ਛੱਪੜ ਨੇੜੇ ਪੁੱਜੇ ਤਾਂ ਮੱਝਾਂ ਨਹਾਉਣ ਲਈ ਇਸ ‘ਚ ਜਾ ਵੜੀਆਂ ਤਾਂ ਇੰਨੇ ਨੂੰ ਅਚਾਨਕ ਛੱਪੜ ਦੇ ਨਾਲ ਲੱਗੇ ਬਿਜਲੀ ਦੇ ਟਰਾਂਸਫ਼ਾਰਮਰ ਦੀ ਇਕ ਪਾਣੀ ‘ਚ ਲੱਗੀ ਹੋਈ ਖਿੱਚ ਰਾਹੀਂ ਕਰੰਟ ਆ ਜਾਣ ਕਾਰਨ ਪੰਜ ਮੱਝਾਂ ਅਤੇ ਇਕ ਗਾਂ ਦੀ ਮੌਕੇ ‘ਤੇ ਮੌਤ ਹੋ ਗਈ | ਜਦ ਕਿ ਬਾਕੀ ਦੀਆਂ ਮੱਝਾਂ ਤੇ ਗਾਵਾਂ ਦਾ ਕਰੰਟ ਆਉਣ ਤੋਂ ਕੁਝ ਕੁ ਮਿੰਟ ਪਹਿਲਾਂ ਛੱਪੜ ‘ਚੋਂ ਬਾਹਰ ਨਿਕਲ ਜਾਣ ਕਰਕੇ ਬਚਾਅ ਹੋ ਗਿਆ | ਉਸ ਨੇ ਦੱਸਿਆ ਕਿ ਉਹ ਪਿਛਲੇ ਕਰੀਬ 30 ਸਾਲਾਂ ਤੋਂ ਸਮੁੰਦੜਾ ਵਿਖੇ ਰਹਿ ਕੇ ਮੱਝਾਂ-ਗਾਵਾਂ ਦਾ ਦੁੱਧ ਵੇਚ ਕੇ ਆਪਣੇ ਪਰਿਵਾਰ ਦਾ ਪਾਲਣ-ਪੋਸ਼ਣ ਕਰਦਾ ਹੈ | ਖ਼ਬਰ ਸੁਣਦਿਆਂ ਘਟਨਾ ਸਥਾਨ ‘ਤੇ ਪਹੁੰਚੇ ਪਾਵਰਕਾਮ ਦੇ ਐੱਸ.ਡੀ.ਓ. ਅਵਤਾਰ ਸਿੰਘ, ਹਰਜੀਤ ਸਿੰਘ ਜੇ.ਈ, ਸਤਨਾਮ ਸਿੰਘ ਜੇ.ਈ. ਤੇ ਸਾਥੀ ਕਰਮਚਾਰੀਆਂ ਵਲੋਂ ਪਿੰਡ ਵਾਸੀਆਂ ਵਲੋਂ ਜਾਣਕਾਰੀ ਲੈਂਦਿਆਂ ਅਗਲੇਰੀ ਕਾਰਵਾਈ ਆਰੰਭ ਕਰ ਦਿੱਤੀ ਹੈ |